مطمئن ہونا 2

نوجوان اپنی شخصیت سے مطمئن ہونا سیکھیں‘ ودیا بالن کا پیغام

ممبئی (این این آئی)بولی وڈ اداکارہ ودیا بالن نے ہمیشہ ہی اپنے انٹرویوز کے دوران نوجوان نسل کو یہ پیغام دیا کہ وہ اپنی شخصیت سے مطمئن ہونا سیکھیں اور اس ہی میں خوش رہے اور دوسروں کو خوش کرنے کی خاطر خود کو تبدیل نہ کریں۔

اداکارہ نے ہمیشہ ہی ان تمام افراد کو شدید تنقید کا نشانہ بنایا جو دوسروں کی شخصیت کا مذاق اڑاتے ہیں جبکہ ایسے ہی کئی اور اہم سماجی مسائل پر بھی آواز اٹھائی۔

ودیا بالن کو خود بھی ان کے وزن پر کئی مرتبہ شدید تنقید کا سامنا کرنا پڑ چکا ہے اور اس ہی حوالے سے اداکارہ نے بتایا کہ اپنے زندگی کے ایک دور میں وہ خود بھی اپنے آپ کو پسند نہیں کرتی تھی۔

ودیا بالن اس وقت اپنی فلم’ ’مشن مونگل‘ ‘کی شوٹنگ میں مصروف ہیں جس میں ان کے ہمراہ اکشے کمار کام کرتے نظر آئیں گے۔

اپنے ایک انٹرویو میں ودیا بالن کا کہنا ہے کہ میری زندگی کا ایک حصہ تھا، جب میں اپنے ساتھ ایک جنگ لڑ رہی تھی، مجھے اپنے جسم سے نفرت تھی، غصہ آتا تھا، میں چاہتی تھی یہ تبدیل ہوجائے، کیوں کہ مجھے ایسا لگتا تھا کہ اگر میں تبدیل ہوجاوں گی تو ہر کوئی مجھے پسند کرے گا، مجھ سے پیار کرے گا، لیکن جب میں نے اپنا وزن کافی کم بھی کرلیا تب بھی مجھے اندازہ ہوا کہ ہر کوئی اس وقت بھی مجھے پسند نہیں کرتا تھا، اس لیے ایسا سوچنا کہ سب آپ کو پسند کریں بالکل بے مقصد ہے۔

اداکارہ کا مزید کہنا تھا کہ بعد میں، میں خود کو پسند کرنے لگی اور میں جیسی ہوں میں نے ویسے ہی خود کو قبول کیا، اب میں زیادہ خوش ہوں، مجھے خوبصورتی کا احساس ہوتا ہے، میں نے خود کو سب سے بڑا تحفہ یہی دیا ہے کہ اب میں دوسروں کی رائے کو اتنی اہمیت نہیں دیتی۔

ودیا کے مطابق انہیں یہ سمجھ نہیں آتا کہ لوگ ہمیشہ وزن کے حوالے سے ہی کیوں بات کرتے رہتے ہیں، اداکارہ کا کہنا تھا کہ ’میں ایونٹس میں جاتی ہوں وہاں یہی باتیں ہورہی ہوتی ہیں، ارے تم نے اتنا وزن کم کرلیا، یا تم نے وزن بڑھا لیا، تم کونسی ڈائیٹنگ کررہی ہوں، کونسی ورزش کرتی ہوں، اور مجھے یہی احساس ہوتا ہے کہ لوگ کتنی آسانی سے دوسروں کے جسم کے حوالے سے بات کرلیتے ہیں۔

اس خبر پر اپنی رائے کا اظہار کریں

اپنا تبصرہ بھیجیں