اسلام آباد(لاہورنامہ) وفاقی وزیر داخلہ شیخ رشید احمد سے اقوام متحدہ کے ہائی کمشنر برائے مہاجرین فیلپو گرانڈی (His Excellency Filippo Grandi) نے ملاقات کی جس میں افغانستان سے انخلاء اور افغان شہریوں کے لئے انسانی امداد سے متعلق بات چیت کی گئی ۔
ملاقات میں افغان شہریوں کو موجود حالات میں تنہا نا چھوڑ نے ،انسانی بنیادوں پر افغان شہریوں کے لئے خوراک، ادویات اور دیگر ضروری اشیاء کا بندوبست کرنے پر اتفاق کیا گیا ۔ اس موقع پر وفاقی وزیر داخلہ شیخ رشید احمد نے کہا پاکستان ہمسایہ ملک افغانستان میں پائیدار امن کا خواہشمند مند ہے، طالبان کو حکومت سازی اور ملکی امور چلانے میں وقت دینا چاہئے،
دنیا کو افغانستان میں زمینی حقائق سمجھنے کی ضرورت ہے، طالبان کو افغانستان میں گورننس کے لئے مالی اور انسانی وسائل یقینی بنانا ہوں گے، طالبان کے زیر حکومت افغانستان کی ایک ہی دن میں یورپ کی طرح ترقی ممکن نہیں، وزیر داخلہ نے کہا افغانستان میں ممکنہ انسانی قحط بدامنی،اور لاقانونیت کو جنم دے سکتا ہے، انسانی ہمدردی کے تحت خوراک اور ادویات کے ٹرک اور جہاز افغانستان بھیجے ہیں،
موجودہ حالات میں پاکستان افغان شہریوں کی انسانی ہمدری کی بنیاد پر امداد جاری رکھے گا، حالیہ تناظر میں پاکستان میں نہ کوئی افغان مہاجر ہے نہ ہی مہاجر کیمپ، افغانستان سے غیر ملکی اور افغان شہریوں کو نکالنے کے لئے سہولت مرکز 24 گھنٹے کام کررہا ہے، وزیر داخلہ نے پاکستان میں افغان مہاجرین کی امداد پر ہائی کمشنر برائے اقوام متحدہ کا شکریہ ادا کیا ۔
اس موقع پر ہائی کمیشنر برائے مہاجرین نے کہا پاکستان کا 30 لاکھ افغان مہاجرین کی مسلسل دیکھ بھال میں کردار قابل رشک ہے، اقوام متحدہ افغان شہریوں کو تنہا نہیں چھوڑے گا،ان کی ہر ممکن مدد کریں گے، اقوام متحدہ نے افغانستان کے لئے فنڈز اورامداد کیلئے اقوام عالم کو متحرک کیا ہے،اقوام متحدہ کے عملے کی سییکورٹی اور ویزہ سہولیات فراہم کرنے پر حکومت پاکستان کے مشکور ہیں۔
