لاہور (لاہور نامہ) وزیراعلیٰ پنجاب سردار عثمان بزدارنے کہاہے کہ پنجاب کی پہلی لائیوسٹاک پالیسی تیار کرلی گئی ہے اور لائیوسٹاک پالیسی منظوری کیلئے جلد کابینہ میں پیش کی جائے گی۔
پالیسی سے صوبے میں لائیوسٹاک و ڈیری ڈویلپمنٹ سیکٹر کی پائیدار ترقی ممکن ہوگی۔وزیراعلیٰ عثمان بزدار نے صوبے کے لائیوسٹاک کا مستند ڈیٹا اکٹھا کرنے کی ہدایت کرتے ہوئے کہاکہ بہترین پلاننگ کے لئے درست اعداد و شمار کا ہونا ضروری ہے۔
انہوں نے کہاکہ ویٹرنری کلینکس کو چیک کرنے کیلئے پنجاب ویٹرنری ہیلتھ کیئر کمیشن قائم کرنے کا فیصلہ بھی کیا گیا ہے- وزیراعلیٰ نے کہاکہ ویٹرنری ڈاکٹروں کیلئے بھی ہاؤس جاب شروع کی جائے گی جبکہ9ویٹرنری ہسپتالوں کو اپ گریڈ کریں گے۔
وزیراعلیٰ نے اوکاڑہ، میانوالی، اٹک، لاہور، سیالکوٹ، فیصل آباد، ملتان،راجن پور اوررحیم یار خان کے ویٹرنری ہسپتالوں کی اپ گریڈیشن کی اصولی منظوری دے دی ہے اور ان ہسپتالوں میں ویٹرنری ڈاکٹروں کو ہاؤس جاب کے مواقع فراہم کیے جائیں گے۔
انہوں نے کہاکہ ڈیرہ غازی خان میں ماڈل ڈیری فارم بنائیں گے۔وزیراعلیٰ نے ہدایت کی کہ محکمہ لائیوسٹاک غیر فعال اداروں کے حوالے سے جامع حکمت عملی اپنائے اور اخراجات کم کر کے وسائل جدید تربیت کی فراہمی پر صرف کیے جائیں۔
وزیراعلیٰ عثمان بزدار نے چھوٹے لائیوسٹاک بریڈرز کیلئے جدید تربیت کا اہتمام کرنے کی ہدایت کرتے ہوئے کہاکہ پنجاب میں لائیوسٹاک فارمرز کو جدید سائنٹیفک طریقہ کار سے روشناس کرایا جائے گا۔
دودھ اورگوشت کی پیداوار بڑھانے کیلئے جدید تربیت کلیدی اہمیت رکھتی ہے۔زیادہ دودھ او رگوشت والے مویشیوں کی نسل کو فروغ دیا جائے گا۔ وزیراعلیٰ نے لائیوسٹاک فارمز کیلئے ہیلپ لائن 9211کو فعال کرنے کی ہدایت کی-
انہوں نے کہاکہ پنجاب میں دودھ اور گوشت کی پیداوارمیں اضافے کابے پناہ پوٹینشل موجود ہے۔لائیوسٹاک شعبے کی پائیدار ترقی سے معیشت مستحکم ہوگی۔ وزیراعلیٰ پنجاب عثمان بزدار کی زیر صدارت اعلیٰ سطح کا اجلاس منعقد ہوا، جس میں محکمہ لائیوسٹاک و ڈیری ڈویلپمنٹ کی کارکردگی اور مستقبل کے پروگرامز کا جائزہ لیا گیا-
سیکرٹری لائیوسٹاک و ڈیری ڈویلپمنٹ نے محکمے کی کارکردگی اورمستقبل کے پروگرامز کے بارے میں بریفنگ دی-صوبائی وزیر لائیو سٹاک و ڈیری ڈویلپمنٹ سردار حسنین بہادر دریشک،وزیراعلیٰ کی معاون خصوصی برائے اطلاعات ڈاکٹرفردوس عاشق اعوان،سیکرٹری لائیوسٹاک و ڈیری ڈویلپمنٹ،سپیشل مانیٹرنگ یونٹ کے سربراہ اورمتعلقہ حکام نے اجلاس میں شرکت کی-
