لاہور (لاہورنامہ) وزیراعلیٰ پنجاب چودھری پرویزالٰہی سے وزیراعلیٰ آفس میں اخوت کے سربراہ ڈاکٹر امجد ثاقب نے ملاقات کی۔
وزیراعلیٰ چودھری پرویزالٰہی نے ڈاکٹر امجد ثاقب کی سربراہی میں اخوت کی سماجی خدمات کو خراج تحسین پیش کیا۔ وزیراعلیٰ چودھری پرویز الٰہی نے کہا کہ اخوت کے اشتراک سے کم آمدن والے لوگوں کیلئے اپنے گھر کا خواب پورا کریں گے۔
کم آمدن والے لوگوں کیلئے گھروں کی تعمیر کیلئے قرضوں کے پروگرام کا از سر نو آغاز کررہے ہیں۔ وزیراعلیٰ نے حکومت پنجاب اوراخوت کے درمیان معاہدے کی تجدیداور پنجاب ہاؤسنگ اینڈ ٹاؤن پلاننگ ایجنسی کے ذریعے 800 ملین کے فنڈز کی منظوری بھی دی۔ وزیراعلیٰ نے کہا کہ اخوت اسلامک مائیکرو فنانس کم آمدن والے افراد کو گھروں کی تعمیر کیلئے قرضے فراہم کرے گی۔
سیلاب متاثرہ علاقوں میں گھروں کی تعمیر کیلئے ترجیحی بنیادوں پر قرضے دیئے جائیں گے۔ انہوں نے کہا کہ سیلاب متاثرین کو چھت کی فراہمی ہماری ترجیحات میں سرفہرست ہیں۔وفاقی حکومت نے سیلاب متاثرین کیلئے کچھ نہیں دیا،اپنے وسائل سے گھر بنائیں گے۔سیلاب متاترین کو اخوت کے ذریعے گھر بنانے کیلئے ممکنہ وسائل مہیا کئے جائیں گے۔
اس موقع پر ڈاکٹر امجد ثاقب نے بتایا کہ اخوت نے 25لاکھ گھرانوں کو قرضے دیئے اور100فیصد ریکوری کی۔ کم آمد ن والے لوگوں کی 36ہزار گھر بنانے میں مالی معاونت کی۔ ڈاکٹر امجد ثاقب نے کہا کہ عام آدمی کے مسائل کے حل کیلئے چودھری پرویزالٰہی کا جذبہ قابل تحسین ہے۔اجلاس میں صوبائی وزیر میاں محمود الرشید،پرنسپل سیکرٹری وزیراعلیٰ محمد خان بھٹی،سیکرٹری ہاؤسنگ اوردیگر حکام نے شرکت کی۔
