اسد عمر

ملک کو بحرانوں سے نکالنے کا واحد حل نئےالیکشن ہیں، اسد عمر

راولپنڈی (لاہورنامہ)پاکستان تحریک انصاف کے جنرل سیکرٹری اسد عمر نے حکمرانوں سے الیکشن کی تاریخ دینے کا مطالبہ کرتے ہوئے کہا ہے کہ ملک کو بحرانوں سے نکالنے کا واحد طریقہ الیکشن ہے، فوری انتخابات ملک کے لیے نا گزیر ہیں۔

رہنما پاکستان تحریک انصاف اسد عمر نے میڈیا سے گفتگو کرتے ہوئے کہا کہ ملک جن حالات سے آج گزر رہا ہے اس سے پہلے کبھی نہیں گزرا لیکن ہم پہل نہیں کریں گے، یہ حکومت بیرونی مداخلت سے آئی ہے، قومی سلامتی کمیٹی کے اجلاس میں مداخلت کی بات تسلیم ہوئی تھی۔

اسد عمر نے کہا کہ عوام کا جذبہ بتا رہا ہے کہ وہ تیار ہیں، عمران خان میں عوام کو موبلائز کرنے کی صلاحیت ہے، انہوں نے جو جو جدوجہد کی قوم بیدار ہو چکی ہے، جتنی بھی طاقت استعمال کر لیں ذہنوں کو تبدیل نہیں کر سکتے، نوازشریف کو کہنا چاہتا ہوں کہ جی ٹی روڈ بدل چکی ہے، نواز شریف کوکہنا چاہتا ہوں یہ وہ جی ٹی روڈ نہیں جو آپ چھوڑ کر گئے تھے، کوئی لندن امریکہ میں بیٹھ کر پاکستان کے فیصلے نہیں کر سکتا۔

انہوں نے کہا کہ جس دن عمران خان اسلام آباد پہنچے گے اس دن عوام کا سمندر ہو گا، حکمرانوں کو شرم آنی چاہیے، اسی عوام سے ووٹ لیتے ہیں اوراسی کو جتھے کہتے ہیں، جو غلطی سے وزیر اعظم بن گئے ان کو خود یقین نہیں کہ وہ اس عہدے پر ہیں، ہمارے ملک میں جمہوری نظام صرف کاغذ پر ہے۔اسد عمر نے کہا کہ افواج پاکستان کی ملک کے لیے قربانیاں ناقابل فراموش ہیں.

ملکی ادارے اسلحہ سے مضبوط نہیں ہوتے، مضبوط قوم پیچھے ہوتی ہے، ایک دم سے نہیں کہہ سکتے کہ کیا منصوبہ ہے، صورتحا ل دیکھ کر ہی حکمت عملی طے ہوتی ہے، ایک طرف کہہ رہے ہیں 200 لوگ نکل رہے ہیں دوسری طرف عدالت سے رجوع کر رہے ہیں، اگر 200 لوگ نکل رہے ہوتے تو اسلام آباد کو کنٹینرز سے بند نہ کر دیا جاتا۔انہوں نے کہاکہ حکمرانوں کو نظر آرہا ہے کہ عوام ان کے ساتھ نہیں ہیں، دو آپشن تھے جلدی کر کے جمعے تک اسلام آباد پہنچیں یا دن زیادہ لگتے ہیں تو لگ جائیں۔