اسلام آباد: یورپی ارکان پارلیمنٹ نے پاک بھارت وزرائے اعظم کو خط لکھا ہے جس میں دونوں ممالک کے درمیان کشیدگی پر تشویش کا اظہار کیا گیا ہے۔یورپی پارلیمنٹ کے 40 ارکان نے وزیراعظم عمران خان اور بھارتی وزیر اعظم نریندر مودی کو خط لکھا ہے جس میں پاکستان اور بھارت کے درمیان کشیدگی پر اظہار تشویش کیا گیا ہے۔خط یورپی پارلیمنٹ کے کرن سجاد کریم کی جانب سے لکھا گیا جس پر یورپی پارلیمنٹ کے وائس پریزیڈنٹ سمیت 40 اران نے دستخط کیے ہیں، خط میں پاکستان اور بھارت کے مابین کشیدگی پر تشویش کا اظہار کرتے ہوئے کہا گیا ہے کہ لائن آف کنٹرول پر کشیدگی تشویش ناک ہے، دونوں ممالک کی قیادت کشیدگی کے خاتمے کے لیے فوری طور پر مذاکرات کا آغاز کرے۔خط میں پاکستان کی جانب سے بھارتی پائلٹ ابھی نندن کی رضاکارانہ واپسی کا خیر مقدم کرتے ہوئے کہا گیا ہے کہ پاکستان کا یہ اقدام مذاکرات اور امن کا راستہ کھولنے کا باعث بنے گا جب کہ کشمیریوں کو شریک کیے بغیر دیر پا امن قائم نہیں ہو سے گا جب کہ یورپی پارلیمنٹ اس ضمن میں اپنا کردار ادا کرنے کو تیار ہے۔
