احسن اقبال

فارن فنڈنگ کیس ،پی ٹی آئی کی درخواست ایک جھوٹی ایف آئی آر سے زیادہ نہیں،احسن اقبال

اسلام آباد (لاہورنامہ)مسلم لیگ (ن)کے رہنما احسن اقبال نے کہا ہے کہ فارن فنڈنگ کیس میں پی ٹی آئی کی درخواست ایک جھوٹی ایف آئی آر سے زیادہ نہیں،

تحریک انصاف نے بیرون ملک کمپنیاں بنائی اور پاکستان دشمن لابیز بھارت اور اسرائیل سے فنڈنگ حاصل کی،

پاکستان کی تاریخ کا فارن فنڈنگ کیس کا فراڈ سامنے آچکا ہے،الیکشن کمیشن کو 2018کے انتخابات کو کالعدم قرار دینا چاہئے،فارن فنڈنگ کیس کے پیسے سے تحریک انصاف نے ملک میں عدم استحکام پیدا کیا،امید کرتا ہوں الیکشن کمیشن عمران خان کو نااہل قرار دے گا،

عمران خان خودہنڈی کے ذریعے فالودے والوں کے نام پیسے منگواتے رہے،عمران خان کو جو این آر او ملا ہوا ہے وہ ختم ہونا چاہیے۔

پیر کو مسلم لیگ (ن)کے رہنما احسن اقبال اور محسن شاہنواز نے الیکشن کمیشن کے سامنے میڈیا سے گفتگو کرتے ہوئے کہا کہ الیکشن کمیشن میں فارن فنڈنگ کیس میں پی ٹی آئی کی فارن فنڈنگ درخواست میں (ن) لیگ آج پیش ہوئی۔

انہوں نے کہا کہ الیکشن کمیشن کی پڑتال کے بعد اسٹیٹ بینک نے درجنوں اکائونٹس کی نشاندھی کی،اب تحریک انصاف نے فارن فنڈنگ کی ذمہ داری ایجنٹس کے اوپر ڈال دی ہے۔

انہوں نے کہا کہ پاکستان کی تاریخ کا فارن فنڈنگ کیس کا فراڈ سامنے آچکا ہے،فراڈ سامنے آنے کے بعد الیکشن کمیشن کو 2018کے انتخابات کو کالعدم قرار دینا چاہئے۔

انہوں نے کہا کہ فارن فنڈنگ کیس کے پیسے سے تحریک انصاف نے ملک میں عدم استحکام پیدا کیا،امید کرتا ہوں کہ الیکشن کمیشن عمران خان کو نااہل قرار دے گا۔

انہوں نے کہا کہ ہم عدلیہ کا احترام کرتے ہیں، اور اپیل کرتے ہیں کہ جلد فیصلہ دیا جائے گا۔انہوں نے کہا کہ چھ ماہ میں انتیس فیصد ترقیاتی اخراجات ہوئے ہیں۔

انہوں نے کہا کہ فارن فنڈنگ کیس میں ہم نے بیان دیا ہے کہ ہم نے ممنوعہ ذرائع سے فنڈنگ حاصل نہیں کی،ہم نے اپنے ڈونرز اور اکائونٹس کی تفصیلات پیش کردی ہیں۔انہوں نے کہا کہ ہم ہم (آج)منگل کو پرامن احتجاج کریں گے۔