لاہور(این این آئی) وزیراعلیٰ پنجاب سردار عثمان بزدارنے یوم شہادت حضرت علی کرم اللہ وجہہ کے موقع پر صوبہ بھر میں سکیورٹی کے فول پروف انتظامات کی ہدایت کی ہے۔ وزیراعلیٰ نے صوبائی کابینہ کمیٹی برائے امن و امان کو ہدایات جاری کرتے ہوئے کہا کہ عوام کی جان و مال کے تحفظ او رپرامن فضا کے قیام کو یقینی بنانے کیلئے ہر ضروری اقدام اٹھایا جائے۔ قانون نافذ کرنے والے ادارے پوری طرح چوکس رہیں۔
انہوں نے کہا کہ امن و امان کے قیام سے بڑھ کر کوئی ترجیح نہیں ہوسکتی اوراس مقصد کیلئے تمام ضروری وسائل بروئے کار لائے جائیں۔ یوم شہادت حضرت علی کرم اللہ وجہہ کے موقع پر جلوسوں کی کڑی نگرانی کی جائے اور طے شدہ سکیورٹی پلان پر عملدرآمد ہر صورت یقینی بنایا جائے۔انہوں نے کہا کہ سماج دشمن عناصر کے مذموم عزائم ناکام بنانے کیلئے پولیس جانفشانی اور مستعدی سے فرائض سرانجام دے اور پولیس افسران خود فیلڈ میں موجود رہیں۔ شرپسند عناصر پر کڑی نظر رکھی جائے۔ امن و امان کی فضا کو برقرار رکھنے کیلئے سکیورٹی کے سخت انتظامات کئے جائیں۔ قانون نافذ کرنے والے ادارے اپنے فرائض کی ادائیگی میں کوئی بھی کسر اٹھا نہ رکھیں۔ تمام متعلقہ ادارے بہترین کوارڈینیشن کا مظاہرہ کرتے ہوئے فرائض سرانجام دیں ۔وضع کردہ سیکورٹی پلان کے حوالے سے مانیٹرنگ کا موثر نظام بھی وضع کیا جائے۔ فول پروف سیکورٹی یقینی بنانے کے لئے جو کچھ انسانی بس میں ممکن ہے وہ اقدام اٹھایا جائے اور کابینہ کمیٹی برائے امن و امان با ضابطہ اخلاق پر پابندی کو ہر صورت یقینی بنائے۔
