اسلام آباد (لاہور نامہ)وفاقی وزیر ہوابازی غلام سرور خان نے کہا ہے کہ سیاست میں کرپشن اور رشوت کے ذمہ دار نواز شریف ہیں،پی ڈی ایم مودی کے ایجنڈے پر عمل پیرا ہے، تحریک انصاف حکومت کا مقصدعوام کی خدمت ہے، پنجاب پولیس سینٹر ٹیکسلا میں خدمت مرکز کا آغاز ،فیصل شہید روڈ کی تعمیر سے عوام کو بہت فائدہ ہو گا،
رواں سال ملکی معیشت میں ترقی اور مستحکم کا سال ہے،مہنگائی کے خاتمے کیلئے اقدامات شروع کر دیئے ہیں،خواہش ہے ہفتہ وار چھٹی اتوار کی بجائے جمعہ کے دن ہو۔جمعہ کو وفاقی وزیر برائے ہوابازی غلام سرور خان نے ٹیکسلا میں ٹریفک پولیس دفتر میں خدمت سینٹراور ختم نبوت چوک ٹیکسلا سے فاروقیہ تک فیصل شہید روڈکی تعمیرکے منصوبے کا افتتاح کیا۔
اس موقع پر ایم این اے منصور حیات خان اور ایم پی اے عمار صدیق خان اور ایم پی اے ملک تیمور مسعود بھی موجود تھے۔اس موقع پر خطاب کرتے ہوئے وفاقی وزیر غلام سرور خان نے کہا کہ تقریبا ساڑھے دس کلومیٹر کی روڈ عوام کی سہولت کیلئے بنائی جا رہی ہے اورتقریباایک ارب 14 کروڑ روپے کی کثیر رقم اس منصوبے پر خرچ ہو گی،یہ روڈ دو رویہ اور کارپیٹڈ ہوگی ۔
انہوں نے کہا کہ عوام کا ایک دیرینہ خواب پورا ہو رہا ہے۔انہوں نے کہا کہ عملی سیاست میرا مشن ہے،عوام کی خدمت ہی ہماری سیاست ہے،قوم کی تقدیر بدلنے کے لئے آپ کے اعتماد پر پورا اتریں گے۔انہوں نے کہا کہ یہ سڑک اس علاقے کی شہ رگ ہے یہ سڑک دو صوبوں کو آپس میں ملاتی ہے ۔
انہوں نے اعلان کیا کہ چونگی نمبر 26 سے حسن ابدال تک سڑک کو کھلی کرنے اور اس کی ری ماڈلنگ کرنے کے لئے منصوبہ اسی سال شروع ہو جائے گا۔ انہوں نے کہا کہ عوام کی سہولت اور ان کو درپیش مسائل کے پیش نظر چونگی نمبر 26 سے حسن ابدال تک چھ رو یہ روڈ موٹر ویطرزکا منصوبہ بھی جلدشروع کیا جائیگا،اس میں تین پیدل چلنے والوں کے لیے اوورہیڈبرج بھی بنائے جائیں گے اس کے علاوہ سروس روڈبھی ساتھ ہوگی،اس کے علاوہ ٹیکسلا بائی پاس کے لیے بھی کوشش کر رہے ہیں کہ اس کی بھی جلد اپروول ہو جائے۔
انہوں نے کہا کہ عوام کی سہولت کیلئے اس علاقے میں سڑکوں کا جال بچھایا جا رہا ہے۔انہوں نے کہا کہ عوام کو بنیادی سہولیات کی فراہمی ہماری اولین ترجیحات میں شامل ہے،اس علاقے کی تعمیر و ترقی کیلئے ہر ممکن کوشش کریں گے،یہ علاقہ کمرشل حب بنے گا۔وفاقی وزیر نے کہا کہ تحریک انصاف کی حکومت کو آپ نے چنا اب آپ کو ریلیف ملے گا۔انہوں نے کہا کہ ملت اسلامیہ کی خوش قسمتی ہے 2021 کا آغازجمعے کا دن تھا اور اس سال کا اختتام بھی جمعہ کا دن ہو گا۔
انہوں نے کہا کہ میری خواہش ہے کہ ہفتہ وار چھٹی اتوار کے بجائے جمعہ کے دن ہو۔انہوں نے کہا کہ پنجاب پولیس سینٹر ٹیکسلا میں خدمت مرکز کا آغاز اور فیصل شہید روڈ کی تعمیر سے یہاں کی عوام کو بہت فائدہ ہو گا۔انہوں نے کہا کہ یہ خدمت سینٹر پنجاب کا پہلا خدمت سینٹر ہے،ہم نے ٹیکسلا میں جوڈیشل کمپلیکس بھی بنایا ہے۔وفاقی وزیر نے کہا کہ ٹیکسلا میں ترقیاتی کام ہم نے کئے اور کریڈٹ مخالفین لیتے ہیں، ان کو شرم آنی چاہے۔
