اسلام آباد (لاہورنامہ)صدر مملکت نے کہا ہے کہ ملک بھر کے علماء و مشائخ نے کورونا کے حوالے سے صحت کے ماہرین اور کورونا ویکسین لگوانے کو درست قرار دیا ہے،
کورونا وباء میں علماء کرام ، منبر و محراب نے بہت مثبت کردار ادا کیا ہے۔ بدھ کو کورونا ویکسین کے حوالے سے ملک بھر کے علماء و مشائخ کے مشاورتی اجلاس سے صدر مملکت ڈاکٹر عارف علوی نے خطاب کرتے ہوئے کہا کہ کورونا وباء کے دوران میڈیا، حکومت اور علماء کرام نے مل کر کام کیا ہے جس سے اس وباء کے پھیلائو میں کمی میں بہت فائدہ مند رہا ہے۔
انہوں نے کہا کہ منبر و محراب عوام کی تدریس کیلئے اہمیت رکھتے ہیں اور معاشرے میں قابل ذکر کردار کا حامل ادارہ ہے جبکہ مشکل وقت میں علماء کرام کی جانب سے بہترین کردار ادا کیا گیا اور وباء کے حوالے سے ایس او پیز پر عملدرآمد کرانے کیلئے انتہائی مثبت انداز میں حکومت کا ساتھ دیا۔
صدر مملکت نے کہا کہ وباء کے دوران صحت کی ضرورت احساس پروان چڑھا ہے اور عوام الناس کی صحت کی حفاظت بنیادی مقصد ہے۔صدر مملکت نے علماء و مشائخ اجلاس کے اعلامیہ پر کہا کہ تمام علماء نے اتفاق کیا ہے کہ صحت کے ماہرین کی رائے اور ویکسین لگوانا درست ہے۔
