لاہور (لاہورنامہ) وزیراعلی پنجاب سردار عثمان بزدار نے کہا ہے کہ پنجاب کو ترقی کی راہ پر گامزن کردیا ہے،3 برس میں صوبے کی ترقی اور عوام کی خوشحالی کے لئے پائیدار اقدامات کیے ہیں،جن کا اپنا ہاوس ڈس آرڈر ہے وہ ان ہاوس کی تبدیلی کے صرف دعوے ہی کرسکتے ہیں ۔
تفصیلات کے مطابق وزیراعلی پنجاب سردار عثمان بزدار سے صوبائی وزیرجیل خانہ جات و ترجمان پنجاب حکومت فیاض الحسن چوہان کی ملاقات ہوئی جس میں فیاض الحسن چوہان نے وزیراعلی عثمان بزدار کو محکمے کی کارکردگی سے آگاہ کیا۔ وزیراعلی پنجاب عثمان بزدار نے پنجاب حکومت کی کارکردگی کو اجاگر کرنے کے لئے گائیڈ لائنز دیں اور کہا کہ 3 برس میں صوبے کی ترقی اور عوام کی خوشحالی کے لئے پائیدار اقدامات کیے ہیں۔
عثمان بزدار نے کہا کہ پنجاب کو ترقی کی راہ پر گامزن کردیا ہے، اپوزیشن خود انتشار کا شکار ہے، جن کا اپنا ہاوس ڈس آرڈر ہے وہ ان ہاوس کی تبدیلی کے صرف دعوے ہی کرسکتے ہیں۔ وزیراعلی پنجاب عثمان بزدار نے مزید کہا کہ حکومت پہلے سے زیادہ مضبوط اور مستحکم ہے، اپوزیشن کے غیر جمہوری ہتھکنڈوں کا جواب عوام کی خدمت سے دیں گے، پاکستان کی عوام باشعور ہے، منفی پروپیگنڈے میں نہیں آئے گی۔
