لاہور(لاہورنامہ) سپیکر پنجاب اسمبلی چودھری پرویزالٰہی سے سوئٹزر لینڈ کے سفیر بینڈکٹ ڈی سرجیٹ Mr. Benedict de Cerjat نے اسمبلی چیمبر میں ملاقات کی۔
ملاقات میں معاشی، تجارتی اور باہمی دلچسپی کے امور پر تبادلہ خیال اور دونوں ممالک کے درمیان سیاحت اور دیگر شعبوں میں دوطرفہ تعاون بڑھانے پر اتفاق کیا گیا۔ چودھری پرویزالٰہی نے کہا کہ پاکستان میں ہائیڈل پاور پراجیکٹس پر کام کرنے کے بے شمار مواقع میسر ہیں، ملک میں پانی کی صورتحال کو بہتر بنانے اور نیشنل گرڈ میں ہائیڈل بجلی کے تناسب کو بڑھانے کیلئے پانی اور پن بجلی کے منصوبے بنائے جا رہے ہیں، ہائیڈل پاور کے دس ڈیموں پر کام جاری ہے۔
انہوں نے مزید کہا کہ لوکل باڈیز پر الیکشن کی قانون سازی میں حکومت اور اپوزیشن دونوں کو آن بورڈ لیا ہے، پاکستان سوئٹزرلینڈ کے ساتھ اپنے تعلقات کی قدر کرتا ہے، سوئٹزرلینڈ کے ساتھ باہمی تعاون خصوصاً تعلیم، صحت، تجارت اور سرمایہ کاری کے تمام شعبوں میں اضافہ کیا جائے، دونوں ممالک کے اعلیٰ تعلیمی اداروں خصوصاً میڈیسن، کلینیکل سائنس، سائیکالوجی اور اکنامکس اینڈ مینجمنٹ کے شعبوں میں روابط قائم کرنے کی ضرورت ہے۔
سوئس سفیربینڈکٹ ڈی سرجیٹ نے کہا کہ پاکستان بڑا خوبصورت ملک ہے، یہاں پر تعیناتی میرے کیریئر کا ایک خوشگوار تجربہ ہے۔ سوئس سفیر نے پنجاب اسمبلی کے نئے ایوان کا دورہ بھی کیا۔ ملاقات میں سیکرٹری کوآرڈی نیشن پنجاب اسمبلی رائے ممتاز حسین بابر، ڈی جی پارلیمانی امور عنایت اللہ لک، ڈپٹی ہیڈ آف مشن سوئٹزر لینڈ البرٹو گروف اور اسامہ قیصر خان بھی موجود تھے۔
