لاہور(لاہورنامہ) صنعتکار رہنماچیئرمین ٹاؤن شپ انڈسٹریز ایسوسی ایشن لاہور چوہدری محمد عدیل بھٹہ نے پٹرولیم مصنوعات میں 30روپے فی لیٹر اضافہ کے بعد وزیر خزانہ کی طرف سے پٹرولیم مصنوعات کی قیمتوں میں مزید اضافہ کے عندیہ پر تشویش کا اظہار کرتے ہوئے کہا ہے کہ پٹرولیم مصنوعات کی قیمتیں تاریخ کی بلند ترین سطح پر پہنچنے سے کاروباری طبقہ پریشان ہے.
اس ہوشربا اضافہ سے ٹرانسپورٹیشن اخراجات بڑھ جائیں گے اورفیول ایڈجسٹمنٹ چارج کی مد میں بجلی مزید مہنگی ہو گی اس لیے پٹرولیم مصنوعات میں ہوشربا اضافہ فوری طور پر واپس لیا جائے۔ چوہدری عدیل بھٹہ نے کہا کہ اگر آئی ایم ایف کیوجہ سے پٹرولیم مصنوعات کی قیمتوں میں اضافہ ناگزیر تھا تو مرحلہ وار بڑھانا چاہیے تھا تاکہ غریبوں اور درمیانے درجے کے افراد پر زیادہ بوجھ نہ پڑے۔ پٹرولیم مصنوعات کی موجودہ قیمتیں ٹریڈرز اور عام لوگوں پر بہت بڑا ظلم ہے۔
پٹرولیم کی قیمتوں میں اضافے سے ملکی معیشت پر منفی اثرات آئیں گے۔ تاجر و صنعتکار کی پیداواری لاگت میں مزید اضافہ ہو گا۔ پٹرول صنعت و تجارت و زراعت کے لئے خام مال کا درجہ رکھتا ہے اور اسکی قیمتوں میں اضافے سے پیداواری لاگت میں مزید اضافہ ہو جاتا ہے اور فیول کی قیمتیں بڑھنے سے بجلی کی قیمت بھی بڑھ جاتی ہے اورمہنگی بجلی،مہنگی پیدوار کا باعث ہے جس سے ملک میں ہوشربا مہنگائی میں اضافہ ہورہا ہے جس کی وجہ سے پاکستان عالمی منڈی میں دوسرے ممالک کا مقابلہ نہیں کرپا رہا .
جس کی وجہ سے صنعتکاروں کو مالی نقصان کے ساتھ ساتھ حکومت کے ریونیو میں بھی کمی واقع ہورہی ہے۔انہوں نے کہا کہ حکومت پٹرولیم مصنوعات کی قیمتوں میں اضافہ کی بجائے اس پر پٹرولیم لیوی اور دیگر ٹیکسوں کا خاتمہ کرے تاکہ پٹرولیم مصنوعات کی قیمتوں میں اضافہ کو کنٹرول کیا جاسکے۔
