لاہور (لاہورنامہ)نگران وزیراعلیٰ پنجاب محسن نقوی نے ڈسٹرکٹ ہیڈ کوارٹر ہسپتال سرگودھا کا دورہ کیا۔
استقبالیہ پرچی کائونٹر پر مریضوں کی لمبی قطاریں،طبی سہولتوں کا فقدان، چیک اپ میں تاخیر،وارڈز کی بری حالت ،مفت ٹیسٹ کی سہولت نہ مفت ادویات، مریضوں نے وزیراعلیٰ محسن نقوی کے سامنے شکایات کے انبار لگا دئیے۔
وزیر اعلیٰ محسن نقوی نے ہسپتال میں طبی سہولتوں کے فقدان اور ابتر صورتحال پر شدید برہمی کااظہار کیا اورایم ایس ہسپتال کی سخت سرزنش کی۔وزیراعلی محسن نقوی نے ڈسٹرکٹ ہیڈ کوارٹر ٹیچنگ ہسپتال سرگودھا کے دورے کے دوران مریضوں کی شکایات،بدانتظامی اور فرائض سے غفلت برتنے پر فوری ایکشن لیتے ہوئے ایم ایس ڈسٹرکٹ ہیڈکوارٹر ٹیچنگ ہسپتال سرگودھا تبدیل اور مستقل پرنسپل کی تعیناتی کا حکم دیا۔
مریضوں نے وزیراعلیٰ کو بتایاکہ ہم صبح 6بجے سے قطاروں میں کھڑے ہیں،کوئی پوچھنے والا نہیں ہے۔ ہمارا کوئی پرسان حال نہیں،ٹیسٹ بھی باہر سے کرانا پڑتے ہیں اور ادویات بھی باہر سے منگوا نا پڑتی ہیں۔ وزیراعلیٰ محسن نقوی نے خواتین و مرد مریضوں کی شکایات سنیں اور ان کے ازالے کے لئے موقع پر ہی احکامات دئیے۔
وزیراعلیٰ محسن نقوی نے ہسپتا ل کے باہر مخصوص لیب سے ٹیسٹ کرانے کے معاملے کی انکوائری کاحکم دے دیا ۔ محسن نقوی نے کہاکہ ڈسٹرکٹ ہیڈ کوارٹر ہسپتال سرگودھا کی حالت زار دیکھ کر انتہائی افسوس ہوا،یہاں سارا کچھ خراب ہے۔
مریضوں کے ساتھ ہسپتال کے ڈاکٹرز بھی پریشان ہیں۔ ٹیسٹ کی سہولت ہسپتال کے اندر دستیاب ہونے کے باوجود باہر سے ٹیسٹ کرانے کا کیاجواز ہے؟۔مریضوں کے ساتھ ایسا سلوک کسی صورت قابل قبول نہیں۔ ہسپتال کی حالت کو بہتر بنایا جائے گا خواہ مجھے با رباریہاں آنا پڑے۔ یہ ہسپتال سرگودھا کے ساتھ ملحقہ آبادیوں کو بھی علاج معالجے کی سہولت فراہم کرتاہے لیکن اس ہسپتال کی حالت انتہائی ابتر ہے۔
بچہ وارڈ میں سرگودھا میڈیکل کالج کے ڈاکٹر اشرف نے وزیراعلیٰ محسن نقوی کو ڈاکٹرز کی سنیارٹی نظر انداز کئے جانے کے حوالے سے شکایت کی۔وزیراعلیٰ محسن نقوی نے مسئلے کے فوری حل کی یقین دہانی کرائی ۔
