لاہور ( این این آئی) پاکستان انٹرپرنیورزفورم کے چیئرمین آصف خان نے آئی ایم ایف کی ایما پر گورنر اسٹیٹ بینک کی تبدیلی اور آئندہ مالی سال 2019-20کے بجٹ کی تیاری میں آئی ایم ایف کی ہدایات اور ان کے مطالبات کی منظوری پر تشویش کا اظہار کرتے ہوئے کہا ہے کہ آئی ایم ایف کی ہدایت پر تیار بجٹ عوام پر بجلی بن کر گرے گا۔
ان خیالات کااظہار انہوںنے صنعتکاروں کے وفد سے گفتگو کرتے ہوئے کیا۔انہوں نے کہا کہ آئی ایم ایف کی شرائط پر بجلی و گیس کی قیمتوں میں اضافہ اور ٹیکسوں کی بھر مار سے عوام کا جینا دوبھر ہوائے گا پٹرول کی قیمتوں میں ہوشربا اضافہ سے عوام ابھی سنبھلنے بھی نہ پائے تھے کہ حکومت کی طرف سے دو سال تک بجلی کی قیمتوں میں مسلسل اضافے کی نوید نے عوام کو بوکھلا کر رکھ دیا ہے ۔
زاہد بخاری سیکرٹری اطلاعات نے کہا کہ عوام تبدیلی کی توقع کر رہے تھے لیکن تبدیلی کے نام پر ان پر ٹیکسوں کا ہوشربا بوجھ ڈالا جارہا ہے جس سے ان کی قوت خرید بھی ختم ہوتی جارہی ہے ۔زاہد بخاری نے کہا کہ آئی ایم ایف سے6ارب ڈالر کے قرضوں سے ملک میں کبھی خوشحالی نہیں آئے گی۔خودانحصاری اور کفایت شعاری کی پالیسی کو اپنایا جائے اور آئی ایم ایف کو ہمیشہ کیلئے خیر باد کہا جائے کیونکہ ان کی شرائط پر عمل پیرا ہوکر عوام کو بدحالی کی طرف گامزن کردیا گیا ہے۔
